Vendimi i Spanjës, Norvegjisë dhe Irlandës për të njohur në bllok shtetin e Palestinës ka nxitur reagimin e Izraelit. Tel Avivi urdhëroi tërheqjen e ambasadorëve nga Dublini dhe Olso, ndërsa tha se vendimi i tyre është një mesazh që nxit ekstremizmin, terrorizmin dhe do të ushqejë paqëndrueshmërinë në Lindjen e Mesme. Ministri i Jashtëm, Israel Katz tha se vendimi i shndërron vendet europiane në pengje të Hamasit dhe i akuzoi se me këtë akt dolën publikisht në mbështetje të terrorizmit. Katz e cilësoi një vendim të shpërfytyruar, që përdhos kujtimin e viktimave të sulmit terrorist të 7 tetorit të vitit të kaluar, minon përpjekjet për lirimin e 128 pengjeve, i jep kurajo Hamasit dhe xhihadistëve të mbështetur nga Irani dhe që vë në pikëpyetje të drejtën e Izraelit për vetëmbrojtje. “Izraeli nuk do të qëndrojë duarkryq. Do të ketë pasoja të rënda. Nëse Spanja ndjek plani e saj për të njohur shtetin palestinez, një vendim i ngjashëm do të merret kundër këtij vendimi”, deklaroi Katz. Kryediplomati izraelit nuk dha më shumë detaje se si do të reagojë ndaj vendimit të Spanjës.