Izraeli bombardoi objektivat në Gaza të martën pasi kryeministri Benjamin Netanyahu këmbënguli se ushtria do të shkatërrojë Hamasin pavarësisht bisedimeve të vazhdueshme në Kajro për një armëpushim dhe marrëveshje pengjesh. Më shumë se gjashtë muaj pas luftës, Hamasi nga ana tjetër bëri me dije se është duke "studiuar" një propozim të ri për një armëpushim të përkohshëm, të paraqitur gjatë bisedimeve që po mbahen me ndërmjetësimin e SHBA, Katarit dhe Egjiptit. Sipas planit, luftimet do të ndaleshin për gjashtë javë, 40 gra dhe fëmijë pengje do të shkëmbeheshin me qindra të burgosur palestinezë dhe deri në 500 kamionë me ndihma do të hynin në Gaza çdo ditë, tha një burim i Hamasit për AFP. Grupi militant tha gjithashtu se "vlerëson" përpjekjet e fundit të ndërmjetësve, ndërsa akuzoi Izraelin për dështimin për t'iu përgjigjur kërkesave të tij të kahershme, duke përfshirë këtu dhe një tërheqje të plotë të forcave nga Gaza. Kryeministri Netanyahu theksoi nga ana tjetër se megjithë presionin në rritje nga Shtetet e Bashkuara, Izraeli do të vazhdojë misionin e tij për lirimin e pengjeve dhe shkatërrimin e grupit terrorist.