Anija e parë me emigrantë të dëbuar nga Italia e cila ishte planifikuar të vinte pasditen e së enjtes në vendin tonë është shtyrë dhe pritet të mbërrijë në ujërat e Shëngjinit ditën e premte, më 11 prill. Ardhja e tyre vjen si pjesë e zbatimit të dekretit të ri të miratuar nga qeveria italiane në fund të muajit mars, i cili transformon kampin e Gjadrit nga një qendër për përpunimin e kërkesave për azil, në një strukturë për mbajtjen e emigrantëve të paligjshëm në pritje të dëbimit. Sipas mediave italiane, në portin e Shëngjinit do të mbërrijnë dy anije që do të transportojnë grupin e parë prej 40 emigrantësh që janë dëbuar nga Italia. Fillimisht, ata do të akomodohen përkohësisht në qendrën pritëse në Gjadër, ku do të qëndrojnë deri në përfundimin e procedurave për riatdhesimin e tyre.