Një prej truprojave të ish-ministrit të Brendshëm Saimir Tahiri është arrestuar nga autoritetet gjermane me qëllim ekstradimin drejt Shqipërisë. Bëhet fjalë për Hekuran Markun, për të cilin ishte lëshuar një urdhër arresti ndërkombëtar. Emri I tij doli në operacionin ndërkombëtar të koduar 'Shpirti'. Gjykata e Posaçme Kundër Korrupsionit dhe Krimit të organizuar Tiranë, në kuadër të operacionit "Shpirti”, i ka caktuar atij, masën e sigurisë “Arrest në burg”, për veprat penale “Trafik narkotikësh”, “Pastrimi i produkteve të veprës penale”, “Grup i strukturuar kriminal” dhe “Kryerja e veprave penale nga organizata kriminale dhe grup i strukturuar kriminal”. Paraditen e së dielës, Marku do të njihet me masën e sigurisë nga GJKKO. Kujtojmë se në lidhje me operacionin në fjalë, Prokuroria e Posaçme përfundoi hetimet dhe çoi për gjykim 31 të pandehur që akuzohen për trafikim narkotikësh dhe grup të strukturuar kriminal. Mes të pandehurve edhe funksionarë publik duke filluar nga prokurori i Vlorës, Maksim Sota dhe Ilirjan Balla, ish-shefi I trafiqeve në Policinë e Shtetit.