Mungesa e masave të policisë pranë vilës së ish diktatorit Enver Hoxha, ku molotovi dhe fishekzjarri i protestuesve të opozitës rrezikoi jetën e një grupi artistësh të huaj, i ka kushtuar postin drejtorit të përgjithshëm të Policisë së Shtetit, Ilir Proda. Proda është shkarkuar këtë të dielë nga detyra e drejtorit të përgjithshëm, teksa vendimi pritet të finalizohet gjatë javës nga ana e Kryeministrit Edi Rama. Drejtimi i Policisë së Shtetit, sipas ligjit në fuqi, i kalon automatikisht si i komanduar nëndrejtorit Sokol Bizhga, që deri më tani ka udhëhequr në terren forcat e policisë në përplasjet me protestuesit e opozitës. Ndërkohë, në analizë është edhe puna e drejtorit të Policisë së Tiranës, Elton Alushi, por për të nuk ka ende një vendim shkarkimi, sipas burimeve të Top Neës, të paktën deri më tani. Nuk përjashtohet mundësia që Alushi, i emëruar në këtë post disa javë më parë, të shkarkohet përgjatë ditëve të javës. Policia e Shtetit u kritikua për mungesën e përgatitjes në ndalimin e protestuesve gjatë tubimit të opozitës mbrëmjen e së shtunës, kur u sulmua me molotov dhe fishekzjarre ish vila e Enver Hoxhës, aktualisht muze për artistë shqiptarë dhe të huaj.