Ish ministri i brendshëm polak, Marius Kaminski, i cili u arrestua dhe u dërgua në qeli të martën, pas një dënimi për abuzim me pushtetin në rolin që mbante më herët, ka nisur një grevë urie. “Unë deklaroj se e trajtoj dënimin tim, një akt të pastër hakmarrjeje politike”, tha Kaminski në një deklaratë të lexuar nga ish zëvendësi i tij, në një konferencë për shtyp para zyrës së kryeministrit. “Si një i burgosur politik, unë nisa grevën e urisë që nga dita e parë e burgosjes time”, vijon deklarata. Policia hyri në pallatin presidencial të Polonisë për të arrestuar dy prej ish drejtuesve të saj të martën, duke ekzekutuar një urdhër gjykate për arrestimin e ish ministrit të brendshëm dhe ish zëvendësit të tij, në një përplasje të përshkallëzuar mes shefit të shtetit dhe qeverisë së re. Pasi fitoi pushtetin në tetor, kryeministri Donald Tusk, një ish zyrtar i lartë i BE-së, premtoi se do të zhbënte politikat e paraardhësve të tij që përballen me akuza për cënim të demokracisë gjatë 8 viteve të qëndrimit të tyre në pushtet. Burgosja e dy ligjvënësve, Kaminskit dhe ish zëvendësit të tij, Maciej Vasik, ishte edhe goditja më e fundit në një përplasje që me gjasë do të jetë vetëm një nga të shumtat gjatë një periudhe bashkëjetese në të cilën qeveria dhe presidenti i përkasin kampeve të kundërta politike. Me qindra protestues u mblodhën të martën para pallatit presidencial, nën organizimin e partisë ligj dhe drejtësi, pjesë e të cilës janë dy të arrestuarit.