Irani minimizoi sulmin ajror të Izraelit, natën e të shtunës, kundër objektivave ushtarake iraniane, duke thënë se ai shkaktoi vetëm dëme të kufizuara, pasi presidenti amerikan Joe Biden bëri thirrje për ndalimin e përshkallëzimit që ka ngritur frikën për një luftë të plotë në Lindjen e Mesme. Dhjetra avionë izraelitë kryen tre valë sulmesh para agimit kundër fabrikave të raketave dhe vendeve të tjera pranë Teheranit dhe në Iranin perëndimor, tha ushtria izraelite.Dhe kjo ishte hakmarrje për sulmin e 1 tetorit të Iranit ndaj Izraelit me rreth 200 raketa balistike ndërkohë që Izraeli paralajmëroi armikun e tij të armatosur rëndë që të mos kundërpërgjigjet pas sulmit të fundit. Irani dënoi sulmin izraelit dhe ministria e tij e jashtme tha se vendi kishte "të drejtë dhe ishte i detyruar" të mbrohej. Por ajo shtoi se "njeh përgjegjësitë e saj ndaj paqes dhe sigurisë rajonale", një deklaratë kjo më pajtuese se ato të mëparshme. Lideri suprem i vendit, Ajatollahu Alio Khamenei, tha ndërkohë se zyrtarët iranianë duhet të përcaktojnë tani mënyrën më të mirë për të demonstruar fuqinë e Iranit ndaj Izraelit. “E keqja e kryer nga regjimi sionist dy net më parë nuk duhet të nënvlerësohet dhe as të ekzagjerohet”, ka thënë Khamenei. Ushtria e Iranit tha se avionët luftarakë izraelitë përdorën "koka luftarake shumë të lehta" për të qëlluar sistemet e radarëve kufitarë në provincat e Ilamit, Khuzestanit dhe rreth Teheranit. "Avionët e armikut u penguan të hynin në hapësirën ajrore të vendit ... dhe sulmi shkaktoi dëme të kufizuara," tha në një deklaratë shtabi i përbashkët ushtarak i Iranit. Kryeministri izraelit Benjamin Netanyahu tha të shtunën se Izraeli kishte zgjedhur objektivat në Iran bazuar në interesat e tij kombëtare, jo sipas asaj që ishte diktuar nga Shtetet e Bashkuara. Biden tha se sulmet dukej se kishin goditur vetëm objektiva ushtarakë dhe shtoi se ai shpresonte se ato do të shënonin "fundin". Dy zyrtarë rajonalë të informuar nga Irani i thanë Reuters se disa takime të nivelit të lartë u mbajtën në Teheran për të përcaktuar shtrirjen e përgjigjes së Iranit. Një zyrtar tha se dëmi ishte "shumë minimal", por shtoi se disa baza të Gardës Revolucionare në dhe rreth Teheranit u goditën gjithashtu.