Një tjetër propozim pritet të paraqitet nga Irani për marrëveshjen e armëve bërthamore me SHBA. Teherani ka deklaruar se propozimi i Uashingtonit ka përmbajtje me “dykuptimësi”. Dy vendet deri më tani kanë mbajtur pesë runde bisedimesh që nga prilli, me synimin që të arrijnë një marrëveshje të re bërthamore, që do të zëvendësonte marrëveshjen që Irani kishte arritur më 2015 me fuqitë bërthamore. Por, nga kjo marrëveshje, presidenti amerikan, Donald Trump, e tërhoqi vendin e tij më 2018. Dy palët kanë mospajtime lidhur me pasurimin e uraniumit nga Irani. Teherani thotë se pasurimi i uraniumit është e drejtë e tij e panegociueshme, por Uashingtoni e konsideron atë si “vijë të kuqe”. Më 31 maj, pas rundit të pestë të bisedimeve, Irani tha se ka pranuar “elemente” të një propozimi të SHBA-së, teksa ministri i Jashtëm, Abbas Araghchi, deklaroi se teksti përmbante “dykuptimësi”.