Tensionet mes SHBA-së dhe Iranit mbeten të larta ndërsa sundimtarët e linjës së ashpër në Teheran kanë përsëritur retorikën armiqësore dhe kërcënimet se do të japin “ndëshkime të ashpra”, përfshirë edhe mundësinë e ekzekutimeve, ndaj protestuesve antiqeveritarë. Presidenti iranian, Masud Pezeshkian, që më herët konsiderohej nga shumëkush si relativisht i moderuar në mesin e udhëheqësve të Iranit, paralajmëroi se një sulm ndaj liderit suprem të shtetit, ajatollahut Ali Khamenei, do të shkaktonte “një luftë në shkallë të plotë”. “Një sulm ndaj udhëheqësit të madh të shtetit tonë është i barasvlershëm me një luftë në shkallë të plotë me kombin iranian”, tha Pezeshkian. Në një fjalim të mbajtur dy ditë më parë, Khamenei e vlerësoi rolin e Pezeshkianit në shtypjen e protestave të fundit, ndërsa pranoi se gjatë protestave janë vrarë “disa mijëra” njerëz. Presidenti amerikan, Donald Trump, është kryesori në mesin e udhëheqësve perëndimorë që ka kritikuar regjimin iranian për shtypjen brutale të protestave antiqeveritare.