Bashkimi Evropian ka dënuar furnizimin e dyshuar të Rusisë me raketa balistike nga Irani, dhe ka premtuar se do të vendosë sanksione të reja ndaj republikës islamike. Në një deklaratë të përbashkët të premten, 27 vendet anëtare të BE-së thanë se furnizimi “është kërcënim i drejtpërdrejtë ndaj sigurisë evropiane” dhe se kjo përbën përshkallëzim, pasi Irani në të kaluarën e ka furnizuar Rusinë edhe me municione dhe dronë. Shefi i politikës së jashtme dhe sigurisë në bllok, Josep Borrell, tha se BE-ja do të përgjigjet shpejt me sanksione të reja ndaj programeve raketore dhe dronëve të Iranit. Irani i ka mohuar akuzat nga Ukraina dhe Perëndimi se po furnizon Rusinë me raketa. Teherani ka mohuar edhe në të kaluarën se e furnizon atë me dronë luftarakë. Irani është tejet i izoluar politikisht për shkak të programit të tij bërthamor dhe shkeljes së të drejtave të njeriut në vend. Vitet e fundit, lidershipi iranian ka forcuar ndjeshëm marrëdhëniet me Rusinë dhe Kinën.