Presidenca e Kosovës ka reaguar sërish lidhur me incidentin e ndodhur në Aeroportin e Shkupti, me presidenten Vjosa Osmani, këtë herë lidhur me konferencën për mediet të kryeministrit Hristian Mickoski. Sipas Presidencës kosovare “Mënyra se si u trajtua incidenti ndaj Republikës së Kosovës në Shkup gjatë konferencës së djeshme për media, është për keqardhje, sepse i ka kontribuar edhe më shumë propagandës kundër Republikës së Kosovës.” Sipas Kosovës, “Ajo që ka ndodhur në aeroportin e Shkupit ka qenë shkelje e qartë e rregullave ndërkombëtare të njohura dhe aplikuara botërisht, prandaj Presidenca pret të njoftohet për masat e ndërmarra lidhur me këto shkelje, ashtu siç është potencuar edhe në notën e protestës të drejtuar nga Republika e Kosovës.” Po ashtu në reagim thuhet se pavarësisht keqardhjes së shprehur nga kryeministri Mickoski, ende nuk ka asnjë përgjigje për shqetësimet e ngritura në notën e protestës drejtuar autoriteteve të Maqedonisë së Veriut.