Fredi Belerit i përfundon këtë të shtunë leja 5-ditore e marrë nga Drejtoria e Burgjeve për t’u betuar si deputet në Parlamentin Europian. Eurodeputeti i dalë nga listat e partisë së Kryeministrit grek, Kiriakos Mitsotakis u rikthye mëngjesin e së shtunës në Shqipëri përmes një fluturimi që u ul në aeroportin e Rinasit. Për mediat, Beleri komentoi kandidatin e opozitës për zgjedhjet e parakohshme në Himarë, Petro Gjikuria. Ai tha se propozimi është serioz dhe shprehu bindjen në fitoren e Gjikurias në këto zgjedhje, pasi sipas Belerit, qytetarët e Himarës do të përfundojnë atë që nisën më 14 maj të vitit të kaluar. Beleri i është drejtuar me një kërkesë Gjykatës së Fierit ku ka kërkuar lirimin me kusht. Seanca e parë për të shqyrtuar këtë kërkesë të Belerit është realizuar në 17 korrik, por është shtyrë për shkak të mungesës së juristit të burgut të Fierit. Belerit i kanë mbetur më pak se tre muaj për shlyerjen e dënimit. Ish-kryebashkiaku i zgjedhur i Himarës, tashmë eurodeputet u dënua nga shkalla e parë e Gjykatës së Posaçme me 2 vite burg, pasi u gjet fajtor për akuzën e blerjes së votave. Dënimi u la në fuqi edhe nga Apeli i Posaçëm dhe KQZ i hoqi mandatin.