Sipas njoftimit, vendi do të përfshihet nga masa ajri shumë të nxehtë dhe të thatë të ardhura nga Afrika Veriore, konkretisht nga rajoni i Saharasë. “Një presion i lartë atmosferik i vendosur në pjesën qendrore dhe jugore të Mesdheut ka krijuar kushte për rrjedhën e një mase ajrore subtropikale kontinentale nga shkretëtira e Saharasë drejt gadishullit Ballkanik,” thuhet në një deklaratë të institutit. Ky fenomen, i njohur si valë e të nxehtit, do të karakterizohet nga temperatura shumë të larta që pritet të tejkalojnë vlerat mesatare për këtë periudhë. Përveç rrezikut për shëndetin publik, situata meteorologjike sjell edhe pasoja për mjedisin dhe bujqësinë. “Zakonisht shoqërohet me rritje ekstreme të temperaturave, ulje të ndjeshme të reshjeve, si dhe rrezik të shtuar për thatësirë dhe zjarre në zona pyjore dhe fusha bujqësore,” thuhet më tej në njoftim. Instituti Hidrrometeorologjik i Kosovës gjithashtu paralajmëron për nivel të lartë të rrezeve të dëmshme të diellit dhe u bën thirrje qytetarëve të shmangin ekspozimin direkt në diell, sidomos gjatë intervalit kohor nga ora 09:00 deri në 17:00. “Moshat e thyera, fëmijët dhe personat me sëmundje kronike mbeten më të rrezikuarit”, theksohet në deklaratën që mban edhe një apel për kujdes të shtuar gjatë këtyre ditëve për shkak të mundësisë së goditjeve nga të nxehtit dhe dehidratimi.