Rreth 50 marinsa amerikanë u përballën me qindra protestues përpara një ndërtese federale në qendër të Los Angelesit, me turmën që kërkonte njëzëri që ata të shkonin në shtëpi. Marinsat u dërguan në qytet nga Presidenti amerikan Donald Trump së bashku me pjesëtarë të Gardës Kombëtare të Kalifornisë në fillim të kësaj jave, pavarësisht kundërshtimeve të guvernatorit të shtetit dhe kryetarit të bashkisë së qytetit, ndërsa zemërimi për bastisjet e emigracionit tërhoqi mijëra demonstrues në rrugë. "Ne nuk jemi armiku juaj, ne jemi populli!" thanë protestuesit ndërsa marinsat shikonin. "Ju po shkelni betimin që keni bërë për të qenë marinsa. Zgjohuni!", thërrisnin ata. Guvernatori i Kalifornisë, Gavin Neësom, dhe udhëheqësit lokalë e kanë quajtur veprimin e Trump një provokim që ka ndezur më keq situatën. Trump dërgoi 700 marinsa të trajnuar për të ndihmuar në zbutjen e trazirave në Los Anxhelos, duke përfshirë deeskalimin dhe kontrollin e turmave. Dislokimi shkaktoi një debat në lidhje me përdorimin e ushtrisë në tokën amerikane, duke qenë se marinsat janë trajnuar për konflikte në të gjithë botën dhe jo në shtëpi, por administrata Trump e ka mbrojtur veprimin e saj duke përmendur nevojën për të ruajtur ligjin dhe rendin. Trump, i cili po përmbush një premtim fushate për të deportuar emigrantët e paligjshëm, ka argumentuar se Los Anxhelosi do të ishte djegur nëse ai nuk do të kishte vepruar shpejt.