Pas sanksioneve amerikane ndaj NIS, kompanisë së rafinerisë së naftës serbe me pronarë rusë, presidenti Aleksander Vuçiç ka deklaruar se gjiganti rus i energjisë, Gazprom, është në bisedime me kompaninë hungareze, MOL, për një shitje të mundshme të aksioneve të tij. “kemi informacione se përfaqësuesit e Gazpromit po bisedojnë me kompaninë hungareze MOL, dhe ne nuk kemi asgjë kundër kësaj. Hungarezët janë miqtë tanë”, u tha Vuçiç gazetarëve. Presidenti serb tha se procesi duhet të arrihet deri më 15 janar. Gazprom zotëron gati 11 për qind të aksioneve në NIS, ndërsa dega e tij e sanksionuar, Gazprom Neft, rreth 45 për qind. Qeveria e Serbisë zotëron gati 30 për qind, ndërsa pjesa e mbetur u përket aksionarëve të vegjël dhe punonjësve. Presidenti serb deklaroi se marrëveshja e furnizimit me gaz të Serbisë me Rusinë do të zgjatet edhe për tre muaj të tjerë. Shtetet e Bashkuara shpallën sanksione të gjera që synonin sektorin e naftës të Rusisë në janar, për shkak të luftës së Moskës në Ukrainë, por për NIS-in zbatimi i tyre u shty disa herë përpara se të hynte përfundimisht në fuqi më 8 tetor.