Humbjet që ukraina i ka shkaktuar ushtrisë ruse janë aq të mëdha sa që kremlini është detyruar të rekrutojë personel ushtarak në pension për të shtuar numrat. Ministria britanike e mbrojtjes thotë se Vladimir Putin i është kthyer personelit që është liruar nga shërbimi ushtarak deri në 2012-ën për të zëvendësuar ushtarët e tij të rënë, me forcat e armatosura të ukrainës që thonë se viktimat mes ushtarëve rusë janë afro 20 mijë. Është e paqartë se sa ushtarë rusë janë vrarë që nga fillimi i pushtimit të Ukrainës më 24 shkurt. Zëdhënësi i Presidentit rus, Vladimir Putin, Dmitry Peskov, pranoi të enjten se Rusia kishte pësuar një numër "të konsiderueshëm" të humbjeve në ushtarë. Në Perëndim, sipas BBC-së, supozohet se midis 7,000 dhe 15,000 ushtarë rusë janë vrarë deri më tani. Ushtria ruse mendohet se po rekruton ushtarë edhe nga rajoni i Transnistrisë në Moldavi, që në mars, u quajt territor i pushtuar nga rusia nga këshilli i evropës. Përpjekjet e kremlinit për të rifurnizuar makinerinë e tij të luftës vijnë ndërsa një zyrtar i lartë ukrainas tha se vendi ishte gati të zbrapste rusinë edhe në rajonin lindor të Donbasit, para se të uleshin për të negociuar një marrëveshje paqeje me Putinin.