Grupi libanez Hezbollah ka lëshuar më shumë se 50 raketa, duke goditur një numër shtëpish në Lartësitë e Golanit, të aneksuara nga Izraeli. Sulmi i të mërkurës ndodhi një ditë pasi sekretari amerikan i Shtetit, Antony Blinken, u takua me negociatorët e tjerë nga Egjipti dhe Katari, në përpjekjen diplomatike për të arritur një armëpushim në luftën në Gazë. Hamasi dhe Izraeli ende nuk i kanë kapërcyer dallimet për arritjen e një armëpushimi në Gazë. Ekipet e emergjencave në Lartësitë Golan thanë se kanë trajtuar një 30-vjeçar i cili u plagos gjatë sulmeve. Një shtëpi u përfshi nga zjarri dhe zjarrfikësit thanë se kanë parandaluar një tragjedi më të madhe, pasi ndaluan rrjedhjen e gazit. Hezbollahu tha se sulmet ishin kundërpërgjigje ndaj një sulmi ajror izraelit në thellësi të Libanit të martën mbrëma që la të vrarë një dhe plagosi 19 të tjerë. Hezbollahu ka lëshuar mbi 200 raketa drejt Izraelit, që kur ky i fundit shënjestroi një depo armësh të Heubollahut rreth 80 kilometra larg kufirit. Që kur nisi lufta në Gazë më 7 tetor, Hezbollahu dhe Izraeli kanë këmbyer zjarr thuajse cdo ditë në kufi. Nga shkëmbimet e zjarrit janë vrarë më shumë se 500 persona në Liban, shumica anëtarë të Hezbollahut dhe 100 civilë, dhe 23 ushtarë dhe 26 civilë në Izrael. Izraeli mori Lartësitë Golan nga Siria në Luftën e Lindjes së Mesme më 1967 dhe më pas i aneksoi. SHBA-ja është i vetmi vend që e njeh aneksimin e Izraelit të këtij territori, ndërkaq pjesa tjetër e komunitetit ndërkombëtar e konsideron Golanin si territor të pushtuar sirian.