Nga Roma në Bruksel, nga Rrësheni në Tiranë dhe nga Tirana nuk dihet se ku do të jetë tjetër. Kështu ka ndodhur me disa personazhe të njohur të krimit në Shqipëri. Policia ka nisur hetimet intensive për atentatin e mbrëmshëm me një minë të telekomanduar në Tiranë, ku mbeti i plagosur Preng Gjini. Atentati ndaj Preng Gjinit, ndodhi vetëm një vit pas ekzekutimit mafioz të Armando Gjinit, vëllait të objektivit të sotëm, i njohur si ushtari i Met Kananit. Kalvari i vrasjeve në këtë familje ka nisur vite më parë, ku dy shkaqet kryesore mësohet të jenë hakmarrja dhe pazaret e drogës. Krimet e rënda janë kryer kryesisht mes dy grupeve kriminale nga Rrësheni, Gjini e Reçi, ku vetëm në 4 vitet e fundit janë ekzekutuar pesë persona. Hetimet për vrasjen me spajper të Kastriot Reçit u thelluan dhe dyshimet shkuan tek Preng Gjini. Madje, ky i fundit mbahej nën përgjim nga Policia.