Influenca aviare e tipit H5N8, e cila është përhapur në disa qytete të vendit, ka qenë në vëmendjen e mediave ditët e fundit, por jo vetëm. Ministria e bujqësisë në disa dalje për mediat është shprehur se ky grip nuk ka prekur vetëm Shqipërinë, por edhe disa vende të Bashkimit Europian, duke shtuar se influenca ka prekur Europën. Durrësi ishte vatra e parë e gripit të shpendëve, ku rreth 500 mijë pula ngordhën si pasojë e kësaj influence. Lidhur me këtë, Prokuroria e Durrësit ka regjistruar një hetim penal për firmat dhe zyrtarët publikë, pas skandalit të ngordhjes së pulave. Hetimet janë bazuar në shkeljen e rregullave të karantinës dhe për shpërdorim detyre. Të martën, nisi procesi i groposjes së një pjesë të këtyre pulave, ndërsa për pjesën tjetër u raportua se ishin izoluar për të shmangur në këtë mënyrë përhapjes e infeksionit te shpendët e tjerë. Zëvëndës ministrja e bujqëisë Ermira Gjeçi tha se vatrat e gripit të shpendëve në vendin tonë janë fshati Rrashbull në Durrës, në Dibër dhe në Prespën e Vogël në Korçë, ku gjatë ditëve të kaluara janë konstatuar pelikanë të ngordhur. Sipas Gjeçit, nuk është raportuar asnjë rast, që ky grip të transmetohet edhe tek njerëzit.