Më shumë se 3.500 njerëz vdesin çdo ditë nga viruset e hepatitit dhe numri global po rritet, paralajmëroi të martën Organizata Botërore e Shëndetësisë. Të dhënat e reja nga 187 vende treguan se numri i vdekjeve nga hepatiti viral u rrit në 1.3 milion në vitin 2022 nga 1.1 milion që ishte në vitin 2019. Sipas raportit të OBSH-së, 83 për qind e vdekjeve regjistrohen nga hepatiti B dhe 17 për qind nga hepatiti C. Për trajtimin e këtyre viruseve ka ilace efektive dhe jo të kushtueshme. Megjithatë, vetëm 3 për qind e personave me hepatit B kronik kanë marrë trajtim antiviral deri në fund të vitit 2022, thuhet në raportin e OBSH-së. Për hepatitin C, ndërkaq, janë trajtuar vetëm 20 për qind e të prekurve. “Këto rezultate bien ndesh me objektivat globale për të trajtuar 80 për qind të të gjithë njerëzve që jetojnë me hepatit B dhe C kronik deri në vitin 2030”, tha në një konferencë për shtyp Meg Doherty, udhëheqëse e programeve globale të HIV-it, hepatitit dhe infeksioneve seksualisht të transmetueshme, pranë OBSH-së. Shefi i OBSH-së, Tedros Adhanom Gebrejesus, tha ndërkohë se raporti “paraqet një pamje shqetësuese”.