Policia ka asgjësuar mbi 300 bimë dhe ka sekuestruar 121 kilogramë hashash në proces tharje gjatë një operacioni kundër kultivimit të drogës të ndërmarrë në Himarë. Gjatë kontrollit të territorit duke përdorur edhe dronë, shërbimet e Policisë, midis fshatrave Shën Vasil dhe Lukovë, në një zonë malore të thepisur, zbuluan 3 parcela ku ishin kultivuar 302 bimë të dyshuara narkotike kanabis, të cilat u asgjësuan. Si autorë të dyshuar të kultivimit të lëndës narkotike, policia ka identifikuar dy shtetasit me inicialet R.B. dhe A.N., përkatësisht 41 dhe 30 vjeç. Dy të dyshuarit, njëri me banim në Lukovë dhe tjetri në Delvinë janë shpallur në kërkim, ndërsa hetimet vijojnë nëse ka persona të tjerë të përfshirë në sipërmarrjen e paligjshme. Ndërkohë, në Vorë policia arrestoi një 22 vjeçar nga Shkodra që u kap në flagrancë në një pikë postare duke tërhequr një pako me 7 kilogramë hashash me përqindje të lartë THC-je. Droga, siç thotë policia, kishte mbërritur nga Kanadaja.