Komiteti Shqiptar i Helsinkit ka ngritur shqetësime lidhur me hartën e re të sistemit të drejtësisë të propozuar më herët nga Këshilli i Lartë Gjyqësor. Kjo hartë e re organizative e gjyqësorit, synon tkurrjen e numrit të gjykatave në rrethe dhe mbingarkesën e dosjeve në Gjykatën e Apelit të Tiranës, sepse, sipas këtij plani, do të ketë vetëm vetëm një gjykatë apeli. Mungesat e theksuara në staf si pasojë e spastrimeve nga sistemi të gjyqtarëve të korruptuar, që solli procesi i vettingut, dorëheqjeve të gjyqtarëve apo edhe mungesa e aplikimeve për vendet vakante në sistemin e drejtësisë, qëndrojnë deri diku në thelb të këtij ndryshimi organizativ. Megjithatë në një deklaratë, Komiteti Shqiptar i Helsinkit, e ka cilësuar ndryshimin e hartës së gjyqësorit, një politikë me interes të lartë publik. Duke sjellë në fokus ligjin “Mbi konsultimin publik”, kjo politikë e re duhet të jetë çështje diskutimi dhe debati jo vetëm në të gjitha organet e sistemit të drejtësisë, por edhe në grupe qytetarësh apo grupe të tjera interesi pasi kjo është një situatë që prek drejtpërdrejt qytetarë, e sidomos ata të cilët kushtet e vështira ekonomike nuk i lejojnë ndjekjen e dosjeve në një gjykatë larg qendrës së banimit.