Greqia pas kufizimeve të vendosura prej muajsh në pikat e kalimit kufitar me vendin tonë pritet që tëzyrtarizojë hapin e parë për lehtësimin e tyre. Burime diplomatike greke kanë pohuar për “Top Channel” se nga dita e hënë 14 qershor do të rritet kuota e kalimit në pikën kufitare të Kakavijës, nga 400 persona që është aktualisht, në 1500 persona. Autoritet greke kanë pranuar kërkesën e ambasadës shqiptare në Athinë lidhur me rritjen e kuotave të kalimit drejt Greqisë. Pritet edhe vendimi për nisjen e procedurave të bashkimit familjar të bllokuar që prej fillimit të pandemisë. Ndryshime pritet të njoftohen edhe për pikat e tjera kufitare, ndërsa autoritetet greke thanë se vendimi përfundimtar për hapjen e kufirit për turistët nga Shqipëria do të merret deri në fund të qershorit dhe do të jete efektive pas datës 1 Korrik. Pak ditë më parë autoritetet greke vendosën hapjen e pikës së kalimit të Qafë Botës, e mbyllur që nga marsi i 2020, ku tashmë lejohen të kalojnë 250 persona në ditë. Ndërsa pika e kalimit kufitar të Kapshticës vijon të mbetet e mbyllur prej muajsh dhe aty lejohen të kalojnë vetëm punëtorët sezonalë si dhe kamionët e mallrave.