Familjet e nëntë viktimave izraelite të sulmeve të muajit të kaluar nga Hamasi, paraqitën një ankesë në Gjykatën Penale Ndërkombëtare me dyshimin se organizata militante palestineze ka kryer krime lufte, tha avokati i tyre. Familjet duan gjithashtu që Hamasi të ndiqet penalisht për gjenocid dhe një gjykatë të lëshojë një urdhër arresti ndërkombëtar për liderët e tij, tha avokati Francois Zimmeray, në një deklaratë të premten. Më 7 tetor, Hamasi kreu sulme në të cilat, sipas zyrtarëve izraelitë, u vranë më shumë se 1400 njerëz dhe më shumë se 200 u rrëmbyen. Ministria e Shëndetësisë e Gazës, e cila drejtohet nga Hamasi, thotë në anën tjetër se më shumë se 9.000 njerëz janë vrarë në Rripin e Gazës që nga 7 tetori. Shtetet e Bashkuara dhe Bashkimi Evropian e kanë cilësuar Hamasin organizatë terroriste. “Ankesa u referohet viktimave, të gjitha civilë”, tha avokati, duke shtuar se disa prej tyre ishin në festivalin muzikor “SuperNova”.