Faza finale e procesit të stërzgjatur gjyqësor në Hagë ndaj katër drejtuesve të Ushtrisë Çlirimtare të Kosovës ka nxjerrë përmasat groteske të një gjyqi që për nga absurditeti ndoshta mund të krahasohet me gjyqin e Jozef K. në veprën ‘Procesi’ të Franc Kafkës. Absurditeti nisi me kërkesën e prokurorisë speciale për 180 vite burg në total për Hashim Thaçin, Jakup Krasniqin, Kadri Veselin dhe Rexhep Selimin, një pretencë që për nga ashpërsia shpërfill kontekstin e luftës çlirimtare të Kosovës dhe krimet serbe të makinerisë së Millosheviçit. Absurditeti vijoi me argumentimet e dhëna nga Prokurorët specialë për pretencën me nga 45 vite burg. Mes rreshtave, prokurorët citonin se nga hetimet kanë zbuluar krimin e madh, atë që Hashim Thaçi dhe të akuzuar të tjerë të UÇK mbanin armë gjatë luftës. Sipas kësaj logjike të prokurorisë, përballë plumbave, vrasjeve, përdhunimeve dhe spastrimit etnik që po kryente Serbia në Kosovë, UÇK duhej t’i përgjigjej me buqeta me lule.