Udhëheqësi ushtarak i Mianmarit, ka refuzuar kërkesat e grupeve rebele për një armëpushim të përkohshëm, që do të mundësonte dërgimin e ndihmave urgjente në zonat e prekura nga tërmeti 7.7 ballë i javës së kaluar. Tre grupe të armatosura kërkuan ndalimin e përkohshëm të luftimeve pas rritjes së numrit të të vdekurve, i cili ka arritur në 2700, me qindra të tjerë të zhdukur. Megjithatë, udhëheqësi ushtarak deklaroi se ushtria do të vazhdojë të marrë masat e nevojshme të sigurisë. OKB-ja ka paralajmëruar se tërmeti ka përkeqësuar një krizë tashmë të madhe në Mianmar, i cili është në mes të një lufte civile që ka zgjatur 4 vjet. Tërmeti, i cili u ndje edhe në Tajlandë dhe vende të tjera fqinje, ka shkaktuar gjithsej 21 viktima në këto shtete. Ekipet e shpëtimit po kërkojnë të mbijetuar në të dy vendet, megjithatë shpresat për gjetjen e jetëve janë duke u zvogëluar ndërkohë që më shumë trupa po nxirren nga rrënojat.