Dëshmitë e gruas dhe djalit të Erjon Goxharës provojnë se motivi i plagosjes së 45-vjeçarit, Lorenc Kosta ka qenë tradhtia bashkëshortore. Bashkëshortja e tij thotë se Erjoni kishte muaj që i ushtronte presion dhe i kërkonte emrin e person me të cilin e kishte tradhtuar. Ajo tha se në muajin korrik, e ka pranuar që e ka tradhtuar vetëm një rast dhe në moment dobësie me Lorenc Kostën. Në të njëjtën dëshmi, bashkëshortja e Erjon Goxharës shton se pas këtij momenti Erjoni e ka ofenduar, sharë dhe ka ushtruar dhunë fizike ndaj saj, ndërsa një javë pas këtij sherri ka marrë në telefon Lorenc Kostën dhe e ka kërcënuar me jetë. Konfliktet në familje i pranon edhe djali i çiftit në dëshminë e dhënë para policisë. Mes të tjerave, ai ka zbardhur edhe lëvizjet me të atin, si personi i parë dhe i fundit që e takoi pas sulmit ndaj Lorenc Kostës. Dëshmia e tij përputhej edhe me variantin e dhënë nga vetë Erjon Goxhara, që në gjendje të rënduar psikologjike doli të premten para gjykatës ku u njoh me masën e sigurisë arrest me burg.