Greqia dhe Turqia do të shqyrtojnë mundësinë e fillimit të bisedimeve që synojnë demarkacionin e zonave të tyre detare, tha të mërkurën ministria e jashtme e Greqisë. Dy vendet fqinje, të dyja aleatë të NATO-s, por armiq historikë mes tyre, kanë qenë në mosmarrëveshje për dekada të tëra për një sërë çështjesh që variojnë nga hapësira ajrore e deri te juridiksioni detar në Mesdheun lindor dhe Qiproja e ndarë etnikisht. Një marrëveshje se ku fillojnë dhe mbarojnë zonat e tyre detare është e rëndësishme për përcaktimin e të drejtave mbi rezervat e mundshme të gazit dhe skemat e infrastrukturës së energjisë. Tensionet janë zbutur vitet e fundit dhe të dy vendet ranë dakord vitin e kaluar të rifillojnë bisedimet mes tyre, duke u zotuar të mbajnë kanale të hapura komunikimi dhe të punojnë për çështjet që i kanë mbajtur të ndarë. Kryeministri grek Kyriakos Mitsotakis dhe presidenti turk Recep Tajip Erdogan u takuan të martën në margjinat e Asamblesë së Përgjithshme të Kombeve të Bashkuara në Nju Jork dhe diskutuan lidhjet dypalëshe, sipas deklaratave nga presidenca turke dhe ministria e jashtme greke.