Themeluesi i partisë së ekstremit të djathtë në Greqi, Agimi i Artë, Nikos Mihaloliakos, është urdhëruar të kthehet në burg, pasi një gjykatë apeli rrëzoi një urdhër të kritikuar gjerësisht për lirimin e tij me kusht. Mihaloliakos, 66 vjeç, dhe anëtarë të tjerë të Agimit të Artë u dënuan në vitin 2020 pasi u shpallën fajtor në një proces që zgjati për pesë vjet, për drejtimin e një bande kriminale të lidhur me një sërë krimesh të urrejtjes, duke përfshirë vrasjen në vitin 2013 të reperit grek Pavlos Fyssas. Mihaloliakos, i cili vuante një dënim prej 13 vitesh, u lirua me kusht më 2 maj, pasi një bord gjyqtarësh miratoi kërkesën e tij, duke marrë parasysh kohën që kishte kaluar në burg dhe shëndetin e tij. Masa u prit me kritika nga partitë politike dhe familjet e viktimave të Agimit të Artë. Një panel gjyqtarësh në gjykatën e apelit doli në përfundimin se Mihaloliakos ishte "i papenduar", dhe se vazhdonte të lavdëronte praktikat e stilit nazist të Agimit të Artë ndërkohë që dyshohej edhe për kryerjen e krimeve të reja. Mihaloliakos u prangos sërish të hënën dhe do të paraqitet para një prokurori, thanë zyrtarët e policisë greke. Avokati i Mihaloliakos tha se ai nuk ishte informuar zyrtarisht për vendimin.