Sipas të dhënave nga Komisioni Shtetëror i Zgjedhjeve në Maqedoninë e Veriut, në zgjedhjet e të dielës kandidatët janë kryesisht burra: 277 ose 89.6%, ndërsa gra janë vetëm 32, ose 10.4%. Në krahasim me zgjedhjet lokale të katër viteve më parë, ka një rritje të lehtë të përfaqësimit të grave, pasi nga 299 kandidatët në atë kohë, vetëm 25 ishin gra, ose rreth 8.4%. Tridhjetë e dy kandidatet në këto zgjedhje vijnë nga 24 komuna, që do të thotë se në dy të tretat e komunave nuk do të ketë gra në fletët e votimit. Numri më i madh i kandidateve femra është në Prilep: 3, ndërsa në Manastir, Velesh, Negotinë, Qendër, Karposh dhe Kisella Vodë janë nga 2 kandidate femra në garë. Marija Majkiç, nga partia pro-ruse Maqedonia e Bashkuar, është kandidatja më e moshuar. Ajo garon në komunën Gazi Babë. Për kryetar të Shkupit do të kandidojë Orce Gjorgjevski nga VMRO-DPMNE-ja, që aktualisht është kryetar i komunës së Kisella Vodës.