Sfidat e gjuhës shqipe në epokën digjitale janë ngritur edhe në nivel gjyqësor. Një vit më parë gjiganti teknologjik Google u padit në Gjykatën e Lartë të Kalifornisë për mospërfshirjen e gjuhës shqipe në gjuhët e mbështetura nga Google. “Ky diskriminim ka pasur pasoja të mëdha në media, marketing, investime të huaja, zhvillim ekonomik dhe teknologjik në Shqipëri, Kosovë dhe kudo që flitet gjuha shqipe” - thuhej në padi. Padia u ngrit nga shqiptaro-amerikani, Haki Dervishi dhe Neshad Asllani - mjek shqiptar nga Kosova. Në padi thuhej se diskriminimi i vazhdueshëm i gjuhës shqipe nga Google ka bërë që folësit e gjuhës shqipe të diskriminohen nga pjesa tjetër e Europës dhe botës në zhvillimin e biznesit, në marketing dhe gazetari, pasi janë të përjashtuar nga platformat Google Ads, Google Adsense dhe Google Admob. Në hartën e gjuhëve që mbështeten, Google ka përfshirë të gjitha vendet e Europës, me përjashtim të vendeve ku shqipja është gjuhë zyrtare, në Shqipëri, Kosovë dhe Maqedoninë e Veriut.