Ambasadori i Gjermanisë në Kosovë, Jorn Rohde ka paralajmëruar se së shpejti do të merret një vendim për masat e BE ndaj Kosovës që do ta zhbllokojë situatën. “Patëm një takim miqësor dhe të mirë për çështjet aktuale, Këshillin e Evropës, heqjen e masave dhe kam treguar pozicionin e Gjermanisë si partner i ngushtë i Kosovës në Evropë dhe së shpejti do të kemi vendime të cilat e zhbllokojnë situatën”, ka deklaruar Rohde. Sakaq, përfaqësuesi i lartë i Bashkimit Evropian për politikë të jashtme dhe siguri, Josep Borrell, pritet që javën e ardhshme të dorëzojë raportin për hapat që ka bërë Kosova në përmbushjen e detyrimeve për heqjen e masave të BE-së ndaj saj. Raporti nga shefi i diplomacisë së BE-së u kërkua nga vendet anëtare të Bashkimit Europian, në mënyrë që të vlerësohet nëse janë pjekur kushtet që Kosovës t’i hiqen masat. Qeveria e Kosovës ka insistuar disa herë se i ka përmbushur kërkesat e BE, se situata në veri të Kosovës është shtensionuar dhe se serbët e Kosovës kanë pasur mundësi të votojnë për shkarkimin e kryetarëve të komunave dhe se tashmë nuk ka arsye që të mbahen këto masa.