Policia e Kosovës, në koordinim me Institutin e Mjekësisë Ligjore dhe Komisionin Qeveritar për Persona të Zhdukur, kanë gjetur mbetje eshtrash të të paktën tre personave të zhdukur gjatë luftës në Kosovë më 1998-1999, gjatë gërmimeve në varrezat e fshatit Hajvali të Prishtinës më 20 tetor. Sipas policisë, urdhri ishtë dhënë nga Gjykata Themelore në Prishtinë. Mbetjet janë tërhequr nga Instituti i Mjekësisë Ligjore për ekzaminime, ndërsa punimet do të vijojnë edhe ditët në vijim. Kosova dhe Serbia arritën pajtueshmëri më 2023 për Deklaratën e përbashkët për personat e zhdukur, në kuadër të dialogut për normalizimin e marrëdhënieve të ndërmjetësuar nga Bashkimi Evropian. Gjatë luftës së viteve 1998/’99 në Kosovë janë vrarë rreth 13.000 njerëz, ndërsa mbi 1.500 vazhdojnë të jenë të zhdukur. Shumica e të vrarëve ishin civilë shqiptarë.