Në Kshillin e Sigurimit të OKB-së, u kërkua mbyllja e Misionit të organizatës së Kombeve të Bashkuara në Kosovë. Ministrja në Detyrë e Punëve të Jashtme, Donika Gërvalla përsëriti edhe njëherë kërkesën për të cilën u bashkua me të njëjtën linjë edhe SHBA. Kryediplomatja e cilësoi misionin si një kosto shtesë për OKB, por nuk i kurseu as akuzat për raporte të njëanshme që nuk pasqyrojnë të vërtetën e zhvillimeve në terren, “duke i injoruar faktet që dëshmojnë përparimin demokratik të Kosovës dhe përkushtimin e saj ndaj paqes dhe sundimit të ligjit”. Ndërkohë përfaqësuesi i SHBA në Këshillin e Sigurimit, Jeff Bartos tha se snë Kosovë nuk ka krizë sigurie dhe se takimet e këtij misioni janë të padobishme. “Nuk ka krizë sigurie në Kosovë dhe UNMK-u nuk ka më rol në qeverisjen e Kosovës. Koha ka ardhur që të tërhiqet misioni. SHBA u bën thirrje shteteve anëtare për të mbyllur operacionet e saj. Ky tranzicion është i tepërt. Këto takime i dëmtojnë institucionet”, deklaroi ai. Ndërkohë Franca nga ana tjetër përsëriti kërkesën që Kosova të themelokë Asociacionin e komunave me shumicë serbe.