Kreu i Grupit Parlamentar të Partisë Demokratike, Gazment Bardhi ka reaguar pas deklaratave të kryeministrit Edi Rama, lidhur me vendimin e Gjykatës Kushtetuese për zv, kryeministren Belinda Ballukun. Bardhi ka theksuar se Shqipëria ka arritur një "precedent unik në botë", duke iu referuar emërimit të Belinda Ballukut në postin e Zëvendëskryeministres dhe ministres, ndërkohë që ajo është e pandehur për abuzime në disa procedura të tenderimeve publike. “Precedent unik në botë është vijimi i qetë i detyrës nga një e pandehur që sipas prokurorisë dhe gjykatës rrezikon të prishë provat apo intimidojë dëshmitarët. Precedent unik në botë është që zyra e Kryeministrit shndërrohet në zyrë avokatie për një të pandehur që i ka shkaktuar shtetit deri më tani një dëm prej të paktën 50 milionë euro. Precedent unik në botë është paracaktimi i tenderave nga një ministër në shtëpinë e tij dhe drejtimi i punëve të shtetit me sms urdhëruese ndaj vartësve”, shprehet në postimin e tij Bardhi. Ai gjithashtu e cilësoi si një tjetër precedent unik që dy institucione kryesore shtetërore, si ARRSH dhe KESH, të kenë drejtuesit nën "arrest shtëpie" dhe ata të vazhdojnë të mbajnë pozitat e tyre. Në përfundim, Bardhi theksoi se kjo situatë po e kthen korrupsionin në sistem dhe po e bën atë një pjesë të administratës shtetërore.