Ushtria izraelite ka akuzuar gjashtë gazetarë të Al Jazeera-s, që mbulojnë luftën në Gazë, se janë apo kanë qenë luftëtarë të grupeve militante palestineze. Izraeli citoi dokumente që supozohet se gjeti në Gazë, dhe informacione të tjera që ka mbledhur, ndërsa bëri këto akuza ndaj gazetarëve, të gjithë burra palestinezë. Ushtria tha se katër prej tyre janë apo kanë qenë të lidhur me Hamasin dhe dy me Xhihadin Islamik Palestinez. Al Jazeera tha se akuzat ishin “të fabrikuara” dhe “pjesë e një sjelljeje më të gjerë armiqësore” ndaj rrjetit pan-arab. Kjo media tha se akuzat ishin “një përpjekje flagrante për të heshtur gazetarët e pakët që kanë mbetur në rajon, duke errësuar në këtë mënyrë realitetin e ashpër të luftës nga audienca në mbarë botën”. Al Jazeera ka selinë në Katar, ku shumë zyrtarë të Hamasit po ashtu gjenden. Katari, që financon Al Jazeeran, po ashtu është lojtar kyç në negociatat për arritjen e një armëpushimi në Gazë, së bashku me SHBA-në dhe Egjiptin. Sipas dokumenteve që ka cituar Izraeli, gazetarët e akuzuar kanë patur role të ndryshme: snajperist, ushtar të këmbësorisë, kapiten, koordinator për trajnime si edhe rolin e përhapjes së “propagandës”. Komiteti për Mbrojtjen e Gazetarëve po ashtu publikoi një deklaratë kritike ndaj Izraelit, në të cilën thuhej se Izraeli “vazhdimisht ka bërë pretendime të tilla të paprovuara, duke mos ofruar asnjë provë të besueshme”.