Operacioni policor i koduar “Bradasheshi’ ka vënë në pranga një 48 vjeçar, i cili akuzohet për shitjen e minave të cilat kontrollohen me telekomandë. Burimet bëjnë me dije se Artur Kazanxhi, 48 vjeç, banues në Durrës vijonte prej disa kohësh aktivitetin e trafikimit të minave me telekomandë. Pas informacionit të marrë në rrugë operative, uniformat blu kanë mbërritur në një lokal në fshatin Bradashesh të Elbasanit, ku 48 vjeçari posedonte 2 mina me telekomandë, me qëllim shitjen në shtetas të tjerë. Si pasojë u bë arrestimi në flagrancë i Artur Kazanxhit. Dyshohet se Kazanxhi mund të mos jetë i vetë person i implikuar në skemën e tregtimit të minave. Autoritetet policore po vijojnë punën hetimore për të identifikimin e pistave të reja kërkimore që mund të rezultojnë në kapjen e personave të tjerë që janë të përfshirë në këtë veprimtari kriminale. Ndërkohë materialet hetimore iu referuan Prokurorisë pranë Gjykatës së Shkallës së Parë Elbasan, për veprime të mëtejshme.