Partia Drejtësi Integrim dhe Unitet zhvilloi një takim elektoral me mbështetësit e saj në kuadër të zgjedhjeve lokale të 14 majit. Ndalesa këtë të enjte ishte në Tiranë ku bashkë me këshilltarët në listën e bashkisë së kryeqytetit, kreu i Partisë për Drejtësi, Integrim dhe Unitet, Shpëtim Idrizi bëri thirrje që politikës t’i shtohet jo vetëm vendimmarrja e të rinjve, por edhe përgjegjësia për llogaridhënie. Sot shohim shumë debate që akoma nuk na tregojnë kush është ai kandidat që ka një vizion për qytetin. Njëri thotë që trafiku është i rënduar, tjetri thotë bëjmë tunel. Ne kemi nevojë për ata që kanë një koncept për qytetin dhe zhvillimin. Kreu i PDIU-së bëri thirrje edhe për referendumet duke e theksuar se shoqëria shqiptare është larguar nga demokracia direkte. Ndërsa sekretarja e përgjithshme e PDIU-së Mesila Doda vuri theksin në gjuhën e ashpër politike që po përdoret në këtë fushatë elektorale.