Një pjesë e një akullnaje në Alpet Zvicerane u shkëput të mërkurën, duke shkaktuar rënien e një mase të stërmadhe akulli, balte dhe shkëmbinjsh që varrosën pjesën më të madhe të një fshati malor që ishte evakuuar për shkak të rrezikut të një rrëshqitjeje shkëmbinjsh, thanë autoritetet. Një person aktualisht është i zhdukur, sipas zyrtarëve. Pamjet me dronë të transmetuara nga transmetuesi kombëtar zviceran SRF treguan një masë të madhe balte dhe dheu që mbulonte plotësisht një pjesë të fshatit jugperëndimor, Blatten, lumin që rrjedh përmes tij dhe anët e pyllëzuara të luginës përreth. "E kemi humbur fshatin tonë," tha Matthias Bellëald, kryebashkiaku lokal në një konferencë për shtyp pas aksidentit. "Fshati është nën rrënoja por ne do ta rindërtojmë." Stephane Ganzer, një zyrtar lokal u tha mediave zvicerane se rreth 90% e fshatit ishte mbuluar nga masa e dheut dhe shkëmbinjve. Zyrtarët thanë se miliona metra kub shkëmb dhe baltë janë shembur që kur fshati u evakuua për herë të parë këtë muaj kur një pjesë e malit pas akullnajës filloi të shkërmoqet, duke shkaktuar paralajmërime se mund të merrte masën e akullit me vete. Një video e shpërndarë gjerësisht në mediat sociale tregoi momentin dramatik kur akullnaja u shemb pjesërisht, duke krijuar një re të madhe që mbuloi një pjesë të malit ndërsa shkëmbinjtë dhe mbeturinat ranë drejt fshatit. Presidentja zvicerane Karin Keller-Sutter shprehu solidaritetin e saj me popullsinë lokale, ndërsa shërbimet e emergjencës paralajmëruan njerëzit se zona ishte e rrezikshme dhe i kërkuan atyre të qëndronin larg, duke mbyllur rrugën kryesore që të çonte në luginë.