Momente frike janë regjistruar në Uashington pasi policia urdhëroi evakuimin e Capitol HIllit, seli e kongresit amerikan, për shkak të një kërcënimi ajror. Prania e një mjeti fluturues të paidentifikuar ka bërë që të ndizet alarmi anti terrorizëm. Alarmi është tërhequr më pas dhe mediat amerikane shkruan se shkak për panikun ishte një avion që transportonte parashutistë për një stërvitje. Kjo ka cuar në zemërimin e Nensi Pelozit kundër autoriteteve të kontrollit të qiejve të cilët i ka akuzuar për neglizhencë që ka shkaktuar edhe një panik të panevojshëm në kongres. “Fakti që autoriteti amerikan i fluturimeve nuk ka informuar policinë e Uashingtonit për eventin e planifikuar është skandaloz dhe i pajustifikueshëm – tha ajo. Anëtarët e kongresit amerikan janë ende të shënjuar nga trauma e sulmit mbi ndërtesë, 6 janarin e vitit të kaluar. Dhe ky alarm i rremë u ka rikthyer në mendje kujtimet e atyre ditëve. Sidoqoftë, ishte thjeshtë një avion që fluturoi rreth kongresit për të lëshuar një skuadër parashutistësh akrobatikë në stadium, para fillimit të një ndeshjeje bejsbolli.