‘Së bashku me parnerët tanë, jemi të shqetësuar për veprimet e njëanshme të Kosovës, që nuk dërgojnë sinjal të mirë’, ka qenë kjo deklarata e presidentit të Francës, Emmanuel Macron gjatë konferencës me homologun serb Aleksandar Vuçiç, për mbylljen e disa degëve të Postës së Serbisë në veri të vendit dhe synimeve të saj për hapjen e urës kryesore mbi lumin Ibër në Mitrovicë. Macron ndodhet në Beograd për një vizitë dyditore, ku Ministria e Mbrojtjes së Serbisë nënshkroi marrëveshje me Francën për blerjen e 12 avionëve të rinj luftarakë Rafale. Macron tha se Franca është e përkushtuar që të themelohet Asociacioni i komunave me shumicë serbe në Kosovë. I pyetur për normalizimin e marrëdhënieve mes Kosovës dhe Serbisë, Presidenti francez tha se kjo çështje “nuk do të zgjidhet pa kompromis nga të dyja palët dhe, në përputhje me rrethanat, nëse nuk ka guxim politik për të arritur një zgjidhje”.