Në forumin e Shoqërisë Civile dhe Think Tank, kryebashkiaku Erion Veliaj u shpreh se Tirana dëshmon transformimin infrastrukturor, por edhe ekonomik, në një hark kohor vetëm 8-vjeçar. “Ky qytet është provë se çfarë mund të bëjë Ballkani Perëndimor. Kemi vuajtur shumë, por gjithashtu jemi shumë krijues. Por, ne kemi aftësinë për të qenë këmbëngulës. Kur u zgjodha kryetar i Bashkisë së Tiranës, para 8 vitesh, qyteti bëri një studim në bashkëpunim me Qendrën e Kërkimit në Harvard dhe në atë moment 25% e ekonomisë ishte në tekstil, 25% tjetër ishin prodhim këpucësh, kryesisht për Guccin dhe Armanin në Itali. Ishin punë që çdokush në Azi mund t’i bënte më shpejt dhe më lirë. Prandaj, thamë çfarë mund të bëjë një qytet dhe një vend i vogël, që të ecë më mirë? Pas tetë vitesh, 25% e ekonomisë është turizëm, kurse 25% tjetër është e fokusuar në teknologji informacioni. Brenda dy mandateve ndryshuam fytyrën e qytetit, në mënyrën si bëjmë ekonomi”, tha ai.