Fondet e ndara prej vitesh nga Qeveria e Kosovës, për Luginën e Preshevës dhe shqiptarët që jetojnë atje, kanë shkaktuar përplasje politike atje. Partitë shqiptare kanë akuzuar njëra-tjetrën për keqpërdorim të fondeve, favorizim selektiv dhe mungesë transparence. Në qendër të debatit është roli i Këshillit Kombëtar Shqiptar (KKSH), institucioni I cili menaxhon mjetet. Qeveria e Kosovës dhe ky këshill, nënshkruan në vitin 2022 Memorandumin për Bashkëpunim, me qëllim “mbrojtjen dhe promovimin e të drejtave të shqiptarëve, si dhe ruajtjen dhe kultivimin e gjuhës, artit, kulturës dhe identitetit shqiptar në Luginën e Preshevës”. Dy vitet e para të zbatimit të memorandumit, fondi I ndarë nga qeveria e Kosovës, ishte nga 2 milionë euro për secilin vit, ndërsa në 2024-rën u rrit në 3 milionë euro, në 2025-ën në 4 milionë euro, edhe pse realizimi i mjeteve të fundit nuk ka nisur ende.