Trafiku ajror në Shqipëri është rritur me gati 117 për qind në muajin korrik në krahasim me të njëjtën periudhë para pandemisë. Të dhënat janë bërë publike nga Këshilli Ndërkombëtar i Aeroporteve, që rendit vendin tonë të parin në listën e trafikut ajror me rritjen më të lartë në krahasim me vitin 2019-të. Nga rajoni, Kosova ka një rritje me 41.5 për qind, Serbia me 24 për qind, Kroacia me 16 për qind dhe Greqia me 15 për qind. Në vend të dytë pas Shqipërisë për fluksin e transportit ajror renditet Armenia me 70 për qind, ndërsa vendi me rënien më të madhe mbetet Ukraina me 100 për qind më pak se viti 2019. Shifrat e Këshillit Ndërkombëtar të Aeroporteve janë bërë publike edhe nga Kryeministri Edi Rama, që thotë se shifrat janë inkurajuese, por duhet të mbahet ritmi i shndërrimit të vendit në një destinacion turistik për të huajt.