Prej disa ditësh në orët e para të mëngjesit e deri në mesditë, në Kapshticë ka pasur fluks të lartë mjetesh me radhë mbi 1 km. Shkak është bërë personeli i reduktuar i palës greke. Qytetarët deklarojnë se palët duhet të merren vesh me njëra-tjetrën si edhe të merren masat për përballimin e fluksit të udhëtarëve. Nga ana tjetër, Konsullata e Përgjithshme e Shqipërisë në Selanik u bën thirrje shqiptarëve që kthehen në Greqi pas pushimeve, që të udhëtojnë në oraret e pasdites drejt vendit fqinj, për të shmangur radhët në mëngjes. “Gjatë ditëve të fundit në Pikën e Kalimit Kufitar të Kapshticës ka patur një fluks të shtuar të kalimeve nga Shqipëria në Greqi, të qytetarëve që kthehen nga pushimet. Nisur nga ky fakt, Konsulli i Përgjithshëm Arqile Sota, ishte prezent të premten gjatë gjithë ditës dhe u takua me autoritetet greke dhe shqiptare të kufirit, si dhe me Drejtorin e Përgjithshëm të Kufirit të Korçës. Nga konstatimet rezulton se ky fluks i kalimeve kufitare, gjë që shkakton radhë dhe pritje, ndodh vetëm në orët e para të paradites. Pas orës 12.00-13.00 dhe në vijim, gjatë pasdites, në Pikën e kalimit kufitar të Kapshticës nuk ka as radhë as pritje. Ju bëjmë thirrje qytetarëve shqiptarë të marrin në konsideratë dhe të vlerësojnë kthimin në Greqi edhe në oraret e pasdites për të mos krijuar radhë dhe për të mos pritur gjatë për të kaluar kufirin” thuhet në njoftimin zyrtar.