Ndërkohë që po numërohen kutitë e fundit të votimit, në disa prej bashkive të vendit, tashmë harta e Shqipërisë ka marrë qartazi ngjyrën mavi në pjesën dërrmuese të saj, me Partinë Socialiste, që do të vijojë të drejtojë sërish të paktën 50 nga bashkitë e vendit. Një rezultat zhgënjyes për koalicionin “Bashkë Fitojmë”, të dyshes së vjetër të politikës shqiptare, Sali Berisha-Ilir Meta, të cilët kanë siguruar zyrtarisht mandatin qeverisës vetëm në 6 bashki, teksa surprizë ndër to është padyshim ajo e Memaliajt. Nga ana tjetër, Partia Socialiste ia doli të marrë një fitore historike në Shkodër, aty ku Benet Beci mori një fitore sa të papritur, aq edhe bindëse, teksa mazhoranca mori gjithashtu për herë të parë me garë të vërtetë edhe bashki si Devolli, Tropoja e Kamza. Koalicioni më i madh opozitar ka dështuar edhe në bastione të tjera si Kamëz, Vorë, Dibër, Mat, Klos, Bulqizë, etj., teksa për herë të parë në historinë e pluralizmit, rrezikon të mos drejtojë asnjë bashki, qendër qarku, nga 12 të tilla.