Financimi i paligjshëm i partive politike nga vende të huaja jo mike nuk mund të adresohet vetëm nga komisioni qendror i zgjedhjeve. Në komisionin e posaçëm për dezinformimin, kryekomisioneri Ilirjan Celibashi kërkoi angazhim të institucioneve përkatëse për ndjekje penale. “Në lidhje me financimin e paligjshëm që lidhet kryesisht me financimin nga subjekte apo shtete te huaja, apo nga subjekte që në vetvete ushtrojnë veprimtari të kundërligjshme, është e vështirë apo e pamundur për KQZ për të marrë informacion për këtë lloj natyre financimi. Sepse financimi nëpërmjet këtyre subjekteve apo për qëllime politike të partive dhe subjekteve zgjedhore është veprimtari që sanksionohet nga kodi penal. Procese të tilla kërkojnë angazhimin e institucioneve përkatëse për ndjekjen penale dhe zhvillimin e procesit penal.”