Fiks Fare ka trajtuar këtë të enjte një denoncim të ardhur nga një qytetar kundrejt spitalit memorial të Fierit. I përfolur si një nga investimet më të mëdha dhe që do t’u vinte në ndihmë qytetarëve, në fakt vetëm po i sorollat ato. Pacienti në denoncimin e tij thotë se në spitalin memorial të Fierit mungon kontrasti për të bërë rezonancën e kokës. Pacienti është i detyruar ta blejë vetë nëse dëshiron të marrë këtë shërbim. Stafi i Fiks Fare udhëtoi drejt spitalit të Fierit, aty ku personeli mjekësor ka pohuar se për të bërë rezonancën e kokës, kontrastin duhet ta blesh vetë pasi spitali nuk e disponon. Pyetja që ngrihet në këtë rast është se ku mund ta gjejnë këtë lëndë spitalore pacientët që kanë nevojë për të tillë shërbim? Në të gjitha farmacitë e Fierit, ku Fiks Fare u interesua nuk gjendej kjo lëndë, por e dinin farmacinë që e shiste kontrastin nën dorë.