Fermerët po protestojnë prej ditësh tashmë në Francë e madje në protestat e tyre ka patur edhe një viktimë e dy të lënduar rëndë. Një fermere vdiq të martën në një postbllok në një autostradë kombëtare në Tuluzë, tha presidenti i organizatës së fermerëve, Arnaud Rousseau. Burri dhe vajza e saj u plagosën rëndë. Të tre duket se po qëndronin pas një bllokade të ngritur në Pamiers, kur një shofer u përpoq të kalonte barrikadën. Makina kishte hyrë në rrugën nacionale pavarësisht një bllokimi rrugor dhe më pas u përplas në errësirë me bllokadën, pas së cilës demonstruesit ishin ulur në një tendë. Sipas njoftimit për media, prokuroria nuk mendon se ka pasur paramendim. Tre personat që ndodheshin në makinë u ndaluan. Pas një takimi midis organizatave bujqësore dhe kryeministrit Gabriel Attal të hënën në mbrëmje, fermerët francezë i zgjeruan protestat e tyre. Në jug të Lionit, sipas prefekturës autostrada e rëndësishme veri-jug A7, pranë Albonit, u bllokua nga rreth njëzet fermerë me traktorët e tyre në të dyja drejtimet gjatë natës.