Nigel Farage teksa u ka bërë thirrje anëtarëve të Reform UK se duhet të jenë të përgatitur për zgjedhje të parakohshme të përgjithshme, pas dorëheqjes së zëvendëskryeministres Angela Rayner, ka njoftuar dhe një takim me kryeministrin Edi Rama. Pas debateve në distancë për numrin e shqiptarëve në burgjet angleze mes kryeministrit Edi Rama dhe udhëheqësit të Reform UK Nigel Farage, ky I fundit ka thënë se po planifikon të drekojë me kreun e qeverisë dhe të flasë po për këtë çështje me qëllim që të arrijë një zgjidhje të mundshme dhe për kthimin e emigrantëve, dhe veçanërisht atyre të burgosur. Pikë kjo që është një nga më kryesoret në axhendën e partisë Reform UK që pretendon se do t’I jap fund emigrimit me varka nga La Mansh. “Ne do të deportojmë kriminelë të huaj. Do të shkoj për drekë pas disa javësh me kryeministrin e Shqipërisë. Mund të rezervoj një avion shumë të madh dhe të marr një ngarkesë me vete (të burgosur), nuk jam i sigurt ende. Ne do ta ndalojmë atë që është një kërcënim për sigurinë tonë kombëtare, atë që është një rrezik për vajzat dhe gratë në rrugët tona. Ne do t'i ndalojmë anijet dhe do t'i ndalojmë e deportojmë ata që hyjnë ilegalisht në vendin tonë, duke bërë atë që bën pothuajse çdo vend normal në të gjithë botën", u shpreh deputeti Farage gjatë fjalimit të mbajtur para mbështetësve në Birmingham.